Dagur 329 ár 4 (dagur 1413, færzla nr. 642):

Þá er Bobby Fischer dauður. Það var ekki við því að búast strax, fannst mér. Dó úr nýrnabilun, segja þeir, vegna þess að hann "trúði ekki á vestræn læknavísindi".

Afi átti myndir af þessum gæja uppi á vegg, þar sem hann var með Spasský.

Í útlendu blöðunum er hann titlaður "Cold war icon", sem setur hann á sama stall og Ronald Reagan, Gorba, Nikita K og James Bond. Allt út af því hann vann Spassky í skák.

Sjáið til, í gamla daga var skák miklu mikilvægara sport en núna. Þegar Fischer vann Spasský, var það eins og vestræna systemið hefði fengið að núka eins og eina Sovéska borg. Eða að minnsta kosti eins og ef einhver hefði toppað Sergei Bubka í stangastökki.

Ég meina, í sovétríkjunum voru íþróttamenn sér-ræktaðir á rannsóknarstofum, á meðan í hinum vestræna heimi urðu menn að nenna þessu sjálfir og sníkja styrki og hvaðeina hjá einkaaðilum, sem voru ekkert endilega hressir með að einhverjir sportidjótar væru að slæpast eins og trúðar á stuttbuxum.

Einmitt. Í sovétríkjunum talar þú ekki í síma, sími talar í þig.

Það hefur nú aðeins breyst, og nú geta sterafylltir sportmenn fengið fullt af pening fyrir að klæðast fötum frá framleiðanda X, því litlu feitu dýrin líta víst svo upp til þeirra.

Annað sem Fischer var frægur fyrir eru Fischer Price leikföngin.



Ekki er mér ljóst hver þessi Price er eða var. Kannski var það Vincent Price? Held samt varla. Hver sem það var, þá hirti sá náúngi víst megnið af gróðanum. Eða það er sú saga sem ég hef heyrt.

Jamm. Fischer var ekki ræktaður á neinni rannsóknarstofu, það er ljóst. Þeir hefðu aldrei gert svona ruglaðan mann á rannsóknarstofu. Ekki viljandi allavega.

***

Tók einhver annar eftir því að Fischer var 64 ára þegar hann dó? Sem er eitt ár fyrir hvern reit á skákborði.

Dagur 326 ár 4 (dagur 1410, færzla nr. 641):

Það virðist hafa snjóað smá. Sem gefur auðvitað til kynna að það hljóti að vera vetur, ef einhver skildi hafa gleymt því. Það var nú smá snjór í gær, en ekkert til að tala um. Ef það myndar ekki lag á götunum þá er það ekkert.

Nú er semsagt tíminn til að búa til snjókall.

Dagur 324 ár 4 (dagur 1408, færzla nr. 640):

Stundum fæ ég áhugaverðan ruslpóst. Oftast ekki, en stundum. Einusinni var það "debt consolidation", og "porn" í nokkurvegin 50-50 skiftingu. Svo komu "það var brotist inn á e-bay reikninginn þinn" tilkynningarnar. Og ég sem er ekki með neinn e-bay reikning.

Öðru hvoru undan farið hef ég fengið sendingar frá einhverri Höllu. Grunar að það sé vírus á tölvunni hennar sem er að gera þetta. Vegna þess að ég ímeilaði henni til baka og hún virtist ekkeert skilja hvað ég var að segja.

Halla Víðisdóttir, það er örugglega vírus á tölvunni þinni.

Ég fæ ennþá póst frá henni öðru hvoru. Kannast ekkert við nafnið.

En það er ekki allt. Hér um Jólin fékk ég póst frá einhverjum Gunnari og einhverri Debóru, sem vildu bjóða uppá aðgang að einhverju dönsku vef-svikamillufyrirbæri, eins og MSN eða hvað þær heita allar þessar vírusveitur. Það er hægt að yfirtaka tölvuna þína í gegnum MSN, vissirðu það?

Jæja, þessi Gunnar og Debóra sendu mynd af sér.



Gunnar.

Kannast ekki við manninn á mynd. Veit ekki hvað hann er að gera með þennan mótor.

Málið er að ég kannast við nokkra Gunnara. Ja, tvo. Gunnar í barnaskóla, sem ég man ekki til þess að hafa hitt í allnokkurn tíma, og svo Gunnar sem ég var að vinna með í Flytjanda fyrir að verða 3 árum.



Debóra.

Ekki get ég sagt ég þekki, eða hafi nokkurntíma hitt neinn með þessu nafni. Kannast heldur ekkert við manneskjuna á mynd. Hver er þetta? Og hvaða illskulegi svipur er þetta á henni? Ég man ekki eftir að hafa nokkurtíma umgengist neina svona forn-egypta.

Ekki líst mér á að skrá mig inn á meðfylgjandi link, því við það sleppur örugglega inn á háskólanetið rafræn fuglaflensa.

Af hverju getur fólk ekki bara ímeilað mér, eða sent mér bréf? Eða hringt í mig? Allt í lagi, það næst ekkert í mig fyrr en eftir hádegi...

Nei nei, ég fæ dularfull skeyti frá mönnum sem heita kunnuglegum nöfnum og múmíu-vinum þeirra.

Furðulegt. Hvað næst?

Dagur 321 ár 4 (dagur 1405, færzla nr. 639):

Reykjavík (og nágrenni) skiftist niður eftir póstnúmerum. Póstnúmerin skiftast svo niður á kerfislausan hátt:

170 skiftist ekki í neitt, þar er bara grótta og nokkur stór hús.
107 skiftist í blokkahverfi og einbýlishúsahverfi.
101 skiftist niður í hverfið handan tjarnar, Laugarveginn og það fyrir ofan hann og það fyrir neðan hann.
103 inniheldur RÚV og eitthvað elliheimili.
105 hefur hlíðarnar öðru megin og einhver hótel og blokkir hinumegin. Í miðjunni eru viðkunnalegri staðir, eins og Flókagatan, þar sem eru flott hús með útsýni yfir alla róna bæjarins, og Háteigsvegurinn, þar sem er frekar lítil byggð.
104 inniheldur iðnaðarsvæði annars vegar og mjög þægilegt íbúðarsvæði hinsvegar. Íbúðirnar eru milli iðnaðarsvæðanna, sem er áhugaverð skipulagning. Ég hef aldrei sagt að snillingar ráði för...
108 er íbúðarbyggð, nær eingöngu fjölbýli, og það liggur í gegnum það hverfi ein hraðbraut og einn vegur. Á venjulega veginum eru ein ljós, á hraðbrautinni svona 200.
109 & 111 er Breiðholtið. 111 er efra, 109 er neðra - sem er bakkarnir og selin. 111 er svo gettó Reykjavíkur, þar sem búa gamlingjar, professional öreigar og allskyns pakk sem við viljum helst gleyma.
í 200 er annað stórt iðnaðarhverfi, sem gaman getur verið að aka í gegnum. Þar er líka íbúðarhverfi sem minna gaman er að keyra gegnum. Hraðbraut liggur þar um, með fjölmörgum ljósum.
201 inniheldur ef ég man rétt, smáralindina, og einhver hús fyrir ofan sjólínu.
210 er annað íbúðarhverfi með iðanaðarhverfi áföstu líkt og krabbamein, og svo er 220, þar sem er slippur og slíkt við sjóinn, og eldforn hús oar, með mjóum rangölum á milli, þar sem er engin leið fyrir nýtt fólk að rata.
221 lítur svo út eins og iðnaðarhverfi, verksmiðjur og slíkt, en er í raun íbúðarhverfi. Efst fyrir ofan snjólínu býr líka fólk í því hverfi. Tel mig hafa séð ísbjörn þar á vappi einu sinni eða tvisvar. Fólk er ekkert að tilkynna ef fólk hverfur þar. Það er vitað hvað gerðist.
112 eru svo gömlu öskuhaugarnir og stærsta sprengja á landinu, og þó víðar væri leitað. Þar býr nú fólk. Iðnaður er eitthvað af skornum skammti nærri íbúðarbyggð.
113 er svo uppi á fjalli, afar ljótt hverfi með gott útsýni þegar það er ekki bylur eða lágskýjað. Þar er líka golfvöllur.
110 skiftist svo í ártúnsholt, sem er við hliðina á hraðbraut íslands, hraunbæ, sem er við hliðina á bílasölu íslands, og gámasvæðið, sem á að líta út eins og gámasvæði... vegna þess að arkitektum íslands finnast vörugámar fallegir. En þvílíkt svindl að göturnar skuli ekki heita eftir gámunum: Maersk, K-line, Samskip osfrv.

Gleymdi ég einhverju?

Dagur 318 ár 4 (dagur 1402, færzla nr. 638):

Jólin og áramótin eru þá loksins búin. Búinn að prenta út stundaskrána. Gæti hugsanlega þurft að vakna á skikkanlegum tíma amk einn dag í viku.

Sá nýja bílinn hans Reynis. það var ógurlegur landprammi. Virðist svífa yfir götuna svipað eins og Dodge Aries. Skilur ekki eftir sig jafn mikla olíu samt, og er aðeins öflugri og aðeins betur smíðaður.



Veit ekki hvernig mun ganga að lesa bækurnar sem ég fékk í jólagjöf. Mig grunar að annað muni ganga fyrir. Þó er ég að verða búinn með þá sem ég fékk frá Hauk. Hún er skrítin.

Ég fann uppi í hillu hjá mér eina síðan í fyrra. Kannski ég lesi þá bók einhverntíma í góðu tómi.

Það eru eiginlega of langir kaflar í bókum til að maður nenni að lesa þær í stuttum frítímum. Ég þarf að athuga þetta þegar ég fer yfir mína. Passa vel uppá að partarnir fari ekki mikið yfir fimm síður. Ég held að passleg lengd sé svona tvær. Það er hægt að lesa á undir korteri, sem er sá tími sem tekur að bíða eftri strætó, eða fara með strætó einhvert, eða hita pizzu, eða bíða eftir pizzu.

Þannig verk má líka við að vera svolítið skrykkjótt - að vísu eru líka sumir sem lesa allt í einum rykk, og fyrir þá er gott að það sé flæði. Þeir mega alveg við stuttum köflum. Þeim mun finnast þeim miða vel í lestrinum þannig.

Ég fékk einhver föt líka. Það er alltaf. Sokka og slíkt, enda segir mamma að maður eigi að henda sokkum um leið og það koma göt á þá. Ekki alveg það sem ég geri. Fékk þessar buxur frá systrunum, sem passa ekki á mig. Eða nokkurn mann sem ég hef séð. Veit ekki hvernig þær eiga að tolla uppi um mig, satt að segja, þar sem þær ná ekki upp á mjaðmagrind. Svo eru þær sjálfniðurgirðandi, sem er voða gott ef maður þarf á klósettið og nennir ekki að girða niður um sig sjálfur; maður bara sest.

Ég skil ekki hvaða tendensar stjórna framleiðzlu svona fatnaðar.

Ég þarf að fara að ná mér í mat, hitta ömmu... gera hluti.



Held þær hafi ekki farið í jólaköttinn. Þær eru nefnilega með húfu.

Dagur 316 ár 4 (dagur 1400, færzla nr. 637):



.50 BMG, .338 Lapua, .308 & .223 NATO.



.338 riffill; accuracy international - enskt apparat. Fínn á hreindýr, seli... kanínur og slíkt. Nákvæmur upp að 1500 metrum, segja þeir. Sennilega í logni.

Hvað um það.

Það er búið að vera fullt af allskyns rusli í sjónvarpinu. Og ef það er eitthvað gott, þá er fullt af truflun, stundum þyrlur, stundum krakkar, stundum foreldrar sem vilja horfa á eitthvað hágæða efni eins og: "heimsins mest sjokkerandi lýtaaðgerðir sem framkvæmdar hafa verið á Britney Spears," eða "Maður er nefndur 2; vatnsglas dauðans!" Ekkert varið í það.

Um daginn var einhver glæpaþáttur. "Pressa." Örugglega ávaxtapressa. Mynnti mig á Danska þáttinn á RÚV. Í danska þættinum á RÚV var eitt morð, og það er aldrei rætt um það, heldur er spunnið mikið um einhvern pólitíkus sem virðist ekki koma málinu neitt við, vörubílstjóra og ... örugglega fullt af öðrum hlutum. Allt þetta tekur 20 þætti.

Íslenski þátturinn fjallar um bíl sem finnst uppi á landi, og í kringum það ráfar fólk sem á krakka og rífst og lið sem heldur að það sé blaðamenn og auðvitað eitt stykki pólitíkus.

Þessir þættir eiga það sameiginlegt að fjalla um ljótt og óáhugavert fólk í óáhugaverðum aðstæðum.

Munurinn á danska þættinum og þeim íslenska er sá, að danski þátturinn er vel leikinn og minnir þess vegna á þokkalega sápuóperu. Íslenski þátturinn er skelfilega illa leikinn, og minnir þess vegna á íslenskt leikrit, eins og voru á RÚV hér í denn, áður en þeir fóru að senda út í lit.

Í danska þættinum var einhver drepinn. Veit ekki enn með þann íslenska. Kannski gerist eitthvað frumlegt. Týndi maðurinn birtist undir lokin sprelllifandi, og hefur allan tímann verið að vinna við gerð Kárahnjúkastíflunnar undir pólsku dulnefni eða eitthvað.

Berum þetta saman við amerísku formúluna: fullt af fólki sem virðist hafa sloppið úr príslista rannsakar morð á fólki sem virðist hafa dottið úr príslista, og leysir málið með hátækni og tónlistarmyndböndum í einungir einum þætti, án þess að pólitíkusar eða einhverjir krakkar komi þar mikið nærri.

Eða breska formúlan, þar sem hvert morðið á fætur öðru er framið í 800 manna bæ úti á landi, á gömlum kalli/gamalli kellingu af gömlum kalli/gamalli kellingu, og bæjar-spæjarinn leysir málið með því að rápa um og tala við alla. Og allir eru í afar smekklegum antík jakkafötum síðan 1930.

Ég ætla ekkert að leggja á mig að horfa á þessa íslensku þætti. Ég man hvernig síðasta glæpasería var: skelfilegt torf. Tjáði mig um það 3 feb 2006.

Dagur 313 ár 4 (dagur 1397, færzla nr. 636):



Þá er komið að því giska á... að spá hvað gerist á næsta ári. Við skulum flokka það í þrennt: það sem gerist alltaf, sama hvað, það sem gerist ekki alltaf en er líklegt, og það sem er frekar fáráðlegt.

Byrjum á því líklegasta:

Ríkið gerir eitthvað asnalegt sem bitnar á allri þjóðinni, en að vanda fagna 25% þjóðarinnar. Það munu einmitt vera þessi 25% sem eru fasistar, og fíla svoleiðis. Svona um það bil 10% af því sem klúðrast endar í fjölmiðlum, en ekkert verður gert í því.

Femínistar segja eitthvað afar talíbanalegt.

Það verður verðbólga upp á svona 7%.

Það verður sett sölumet á einhverju. Einhverju tilgangslausu.

Og nú að því minna líklegu:

Það mun koma eldgos. Ég er alltaf að spá því, svo það hlýtur að rætast svona fimmta hvert skifti, að jafnaði.

Árekstur loftsteinsins og Mars verður afskaplega flott sjó.

Húsnæðisverð mun lækka að raunvirði. Í krónum talið ekki svo mikið, en um svona 7% í raun. Fólk fer þá að fara að hafa efni á því aftur - innan tveggja ára eða svo.

Femínisti mun eignast (glasa*)barn, og nefna það "F-4." Kyni þess verður haldið leyndu.

Bandaríkjamenn munu skifta um forseta, og fara beint í stríð við Íran. Ekki nauðsynlega í þesari röð. Ísraelar munu taka þátt í því. Þeir munu segja að það sé vegna kjarnorkuáætlunar þeirra. Þetta verður til þess að dollarinn fellur niður í svona 45 krónur. Sem aftur veldur því að átta tonna pallbílar verða mjög billegir.

Hestur og maður deyja í hörmulegu bílslysi milli landcruiser 200 jeppa með hestakerru og átta tonna amerísks pallbíls. Hestsins verður sárt saknað, enda jarðaður með viðhöfn. Illa farið með gott kjöt þar.

Lögreglan mun byrja að eltast við þá sem reykja opinberlega. Í framhaldið mun glæpum fjölga sem því nemur, við mikla undrun fjölmiðla, og skelfingu húsmæðra um alla Reykjavík.

Löggan fær langþráðar rafbyssur, og það líða ekki nema tveir mánuðir áður en fyrsta dauðsfallið verður af þeim sökum. Það mun vera einhver útúr dópaður hálfviti, sem mun fyrir vikið verða píslarvottur.

Fleiri löggur verða barðar á þessu ári en því síðasta.

Bandaríska hryðjuverkalöggjöfin verður til þess að 90% allra sem ferðast til landsins verða ólöglegir innflytjendur og dópsmyglarar.

Og að undarlegri hlutum:

Það mun koma á daginn að Fidel Castro er búinn að vera dauður í 2 ár. Maðurinn sem kemur fram fyrir hans hönd er tvífari hans sem hefur unnið við að vera skotmark launmorðingja hjá honum síðan 1977.

Rússar taka að sér að reka herstöð á Íslandi, að ríkisstjórn landsins óforspurðri.

Það mun finnast Al-Kæda sella á landinu. Tíu árum síðar mun koma í ljós að Björn Bjarna flutti hana inn sjálfur til að búa til hryðjuverkaógn til að sérsveitirnar og greiningardeildirnar hefðu eitthvað að gera.

Fólk verður beðið um að halda niðri í sér andanum í eina mínútu á dag eða meira til að draga úr losum gróðurhúsalofttegunda. Á sama tíma munu allir ráðherrar og þingmenn fá sér nýjan landcruiser, því það stendur "200" á honum.

Í tíð svarta svansins munu draugar fortíðar tákna helför gegn græna manninum á meðan styttan af Einari Ben mígur á mann og annan og svínið svitnar í sána.

Amen.

*annað hvort er maðurinn í glasi, eða barnið...



Eftir 17-18 ár verður gert grín að því sem er flott nú. Njótið þess að vera asnaleg þangað til.

Dagur 311 ár 4 (dagur 1395, færzla nr. 635):

Þá er árið að fara að klárast, og tími til að skoða hvað af spádómum mínum síðan í janúar hafa gengið eftir:

Ég verð illa svikinn ef Fidel Castro hrekkur ekki uppaf í ár.

Ég er illa svikinn. Árið skuldar mér afsökun.

það verða kosningar. Þær munu fara svona: D fær 40%, S fær 25%, VG fær 10%, F fær 7-8%, B fær 10%

VG fékk 14%, en að öðru leiti var þetta rétt hjá mér. En, að spá um úrslit kosninga á íslandi er svona eins og að spá því að nóttin verði dimm á eftir.

Það verður jarðskjálfti í Kalíforníu aftur.

Það urðu alveg jarðskjálftar, en ekki í Kalíforníu.

það heldur áfram að vera ólga í mið-austurlöndum,

Right on.

fólk í fréttum mun halda áfram að vera illa máli farnir vitleysingar.

... og horfir ekki til bóta á næsta ári.

Greiningadeild ríkislögreglustjóra mun ítrekað verða sér til skammar á komandi árum, en mun ekki verða lögð niður fyrir vikið.

Hvað gerir greiningardeildin annars? Ekki voru það þeir sem leyfðu öllum þessum bófum að rápa inn og út úr landinu? Eða hvað...?

Lögreglan verður verr og verr liðin eftir því sem hún sekkur dýpra í fasisma, en eftir því sem hún sekkur dýpra í það fen nær hún fleyri dópdílerum og neytendum, svo og öðrum aðilum sem ekki töldust glæpamenn í fyrra en eru það nú.

Samkvæmt fréttum stemmir þetta hjá mér. Og ekki bara það, heldur er hér á ferðinni fullkomlega endurnýtanlegur spádómur. Hann verður alltaf sannur.

Ríkið mun klúðra einhverju.

Það er það sem Ríki gera. Hugsið ykkur, ef ekki væri fyrir Ríkið, myndi svo fátt klúðrast að til hagsbóta horfði. Við getum ekki haft það.

Gæjinn sem rann á bananahýði og kveikti því óvart í á 11 stöðum í eyjum fyrir algjöra slysni og óvitahátt næst, en verður sleppt aftur að lokinni yfirheyrzlu. Þá rennur hann til í hálku og kveikir óvart og fyrir einbera slysni í á tveimur stöðum í viðbót.

Það var einhver tekinn til yfirheyrzlu. Ég tjái mig ekkert um það, vitandi ekkert um það mál.


Færri munu deyja í umferðinni í ár, en til að vega upp á móti því munu fleyri slasast, því vegna hraðatakmarkana munu gangandi vegfarendur gera sig heimakomna úti á miðri götu í meira mæli en áður.

Satt og rétt, sýnist mér.


Það fer að gjósa einhversstaðar. Ég er viss um það. Í Heklu eða einhversstaðar. Það hefur ekki komið gos svo lengi.

Ég er enn að bíða. Landið hefur um 8 tíma til að láta það rætast.

Ég er nú enginn Nostradamus. Af 11 ágiskunum... ég meina spádómum, þá hafa 5 nokkuð ljóslega gengið eftir, ég er ekki svo viss um 2, og allt hitt hefur svikist undan eftirgengni.

Gengur bara betur næst.

Dagur 307 ár 4 (dagur 1391, færzla nr. 634):

Einusinni fyrir langa löngu var jólarásin. Hvar er hún nú? Þið hljótið að muna eftir henni: útvarpsrás sem spilaði óviðeigandi músík milli þess sem heimskir krakkar töluðu tómt bull og gerðu símaöt hjá vinum sínum.

Hvar er jólarásin? Hvernig getur maður komist í almennilegt jólaskap án þess að einhver asni spili fyrstu tuttugu sekúndurnar úr einhverju rapp-lagi, og byrji svo að kjafta um hvað vartan á stóru tá vinstri fótar sé orðin stór?

Jamm.

Í staðinn get ég náttúrlega dundað mér við að þjálfa hundinn í að bíta köttinn. Það hefur ekki gengið sem skildi. Jafn illa gengur að fá köttinn til að bíta hundinn. Á morgun get ég drukkið fullt af víni og teipað rakettur við þessi dýr, og sent þau bæði út á sporbaug.

Ég held ég geri það bara.

Dagur 305 ár 4 (dagur 1389, færzla nr. 633):

Jólabíó:



Santa claus conquers the martians.

Ugh...

Dagur 302 ár 4 (dagur 1386, færzla nr. 632):

Þá er ég fyrir löngu kominn heim.



Hér er hundurinn:



Hér er kötturinn:



Hér er stór hluti af fjölskildunni. Af þeim sem eru á þessari mynd hér fyrir neðan eru... margir... býst ég við... mættir. Hef ekki nennt að fara yfir það náið. Skilst helst að Illugi ætli að koma einn af þessum dögum. Á næsta ári kannski. Eða eftir 10 ár. Mig minnir einhvernvegin að mamma hafi borið þær fregnir í mig fyrir mörgum tunglum að hann vildi fá far einhverntima, á einhverri dagsetningu, til Eyja. Veit ekki meir. Hann hefði geta hringt beint í Hannes, en nei...



Amma ætlar að vera heima hjá sér yfir Jólin. Hér er mynd af henni síðan seinast:



Hún sveltur ekki þarna í vesturbænum held ég.

Fleiri dýramyndir fyrir ykkur:



Dýr



Dýr



Dýr.



Þá er þetta farið í hund & kött.

Dagur 299 ár 4 (dagur 1383, færzla nr. 631):

Lognið er á svo mikilli ferð í eyjum, blandað vatni og hrist, að það er ekki fært þangað örðuvísi en með mannskemmandi farartækjum.



Þessari mynd stal ég á fólskulegan hátt á eyjar.net.

Hvað þá? Nú... eitthvað, býst ég við.

Búinn að ná í jólapakka handa öllum. Flestum, allavega. Hef þá tíma til að pakka inn. Það á eftir að fara í taugarnar á öllum jafnt, býst ég við. Æ, ég veit það ekki. Þarf að byrja að gefa öllum bara kippu af bjór eða eitthvað. Eða rauðvín. Hátíðarskapið svífur svo vel á mann eftir nokkur glös af því.

Kannski ekki þetta rauðvín samt. Ekki nema 12.5%, lofar ekki góðu. Kemur sennilega af köldu svæði þá. Þetta! Með 14%, þá ætti það að koma vel út - eftir svona 2-3 ár.

Hmm... ætti ég að ná mér í pizzu? Fara svo með pizzuna að heilsa upp á ömmu? Kannski...

Dagur 297 ár 4 (dagur 1381, færzla nr. 630):



Ég ætla að kalla þessa mynd: "Úrval í Ljósaperum."

Þessi mynd er innblásin af auglýsingum sem ég hef heyrt í útvarpinu. Það virðist nefnilega vera, að til að gera auglýsingu, þá þarf maður ekki að hafa klárað barnaskólann.

Ég nefni dæmi: "Við höfum mikið úrval í jólaseríum," "hér er mikið úrval í tónlist," osfrv.

Sko, það er mikið úrval í kjötborðinu í Nóatúni, það er úrval í Húsgagnahöllinni, og það er úrval í Bónus. Ég get hinsvegar sagt með fullvissu að það er EKKERT úrval í ljósaperum, fyrir utan þessar sem ég hef mynd af hér að ofan.

Málið er, að á íslensku; hinu framandi og dularfulla tungumáli sem fjölmiðlafólk kann ekki; þá er úrval AF jólaseríum Í þessari og hinni búðinni. Það er úrval af kjöti í Nóatúni, það er úrval af tónlist þarna og á hinum staðnum, og það er úrval af húsgögnum í húsgagnahöllinni.

Það er ekki úrval í kjötinu. Að minnsta kosti ekki mínu kjöti. Og síðasta hefti af Úrvali sem ég sá var frá því 198X, sem myndi ekki gera steikina mjög listaukandi. Það er lágmarkskrafa að það sé nýtt Úrval, sem annar hver maður á landinu er ekki búinn að blaða í.

Úrval í jólaseríum... *grml*

Við hverju er svosem að búast af fólki sem getur ekki talað í 2 mínútur án þess að segja að eitthvað sé varðandi eitthvað annað?

Hvernig verður tungumálið í framtíðinni?

"Þetta er Máni Snær, varðandi nafn, hann er 14 hvað varðar aldur varðandi ár og er í námi varðandi skóla hvað varðar 8. hvað varðar bekk."

Hljómar vel, ekki satt?

Þetta lið segir kannski líka "Ég hlaupti," og "mér langar?"

Dagur 295 ár 4 (dagur 1379, færzla nr. 629):



Þá er að uppfæra þetta, þó ekki sé til annars en að halda í við klámvæðinguna. Það verur mikilvægara með hverjum deginum.

Var að hlusta á þá í útvarpinu áðan, veit ekki hvaða stöð, bylgjan, 9.77, eða RÚV, þar sem var verið að tala um klám. Jú, einn af þeim var víst á móti öllu klámi og strippbúllum á þeirri forsendu að það fólk sem þar vinnur við að afklæðast hafi allt meira og minna verið misnotað í æsku og hefði þess vegna ekki vit fyrir sér.

Það var orðað einhvernvegin þannig, að þessar blessuðu súludömur hefðu allar verið þvingaðar út í þetta. Ekki kom fram hvernig. Ætti að vera auðvelt þar sem þær eiga að vera hugsunarlaus átómöt.

Þetta eru náttúrlega áhugaverðir fordómar í garð súludansara.

En hvað um það, ég fékk það helst út, að ef fólk hefði verið misnotað í æsku, þá hefði það ekkert stjórn á gerðum sínum, og bæri þar af leiðandi ekki ábyrgð á þeim. Væru í raun bara vélar, eða eins og pöddur. Nú, ég hugsa með mér, ef fólk ber ekki ábyrgð á gerðum sínum, orðið meira en 5 ára gamalt, þá eru bara tvær leiðir í stöðunni:

A: það getur farið beint inn á Klepp og verið þar alla tíð, enda er það greinilega öllum til ama úti á götu, eigrandi um stefnulaust þar til einhver platar það til að vinna á bar.

B: Það gæti farið á þing. Þar ber enginn ábyrgð á neinu, þær setningarnar sem þingmenn segja þurfa ekkert að vera málfræðilega rétt upp byggðar né þarf eitt einasta orð sem viðkomandi lætur úr sér skiljast. Fullkomið djobb fyrir einstakling sem hefur ekki vit fyrir sér.

Ég velti líka fyrir mér, hvort fólk sem orðið hefði fyrir títtnefndri misnotkun í æsku hætti þá ekki bara að vera "sentient." Samkvæmt þeirri kenningu þá væri að meinalausu hægt að nota slíkt fólk í allskyns líffærarannsóknir sem væri alveg siðlaust að setja venjulegt, lifandi, ózombifíað fólk í.

Nei, ég held að fólk þurfi að bera ábyrgð á sér og gjörðum sínum sjálft, sama hve misnotað það er. Nauðgun er engin afsökun fyrir óvitahegðun seinna á ævinni. Allir yfir 10 ára aldri eru ekki óvitar lengur, og 18 ára eru lagalega sjálfráða, skilst mér. Sama hvað. Mis-púritanskir hópar úti í bæ geta ekki verið mamma þeirra allra að eilífu.

Hefnd get ég skilið*, en að fletta sig klæðum í mánuð fyrir pening, og kenna einhverju atviki úr æsku um - það er bara kjaftæði.

*Það eru fullkomlega eðlileg og fullkomlega ókristileg** viðbrögð við ofbeldi.
**Kristni er ekkert ofur-eðlileg hegðun.***
***Trúarbrögð, á meðan eðlileg, vinna til að hamla allskyns eðlilegri hegðun, því hún er ekkert alltaf viðeigandi.
****Fólk er ógeðslega heimskt.

Dagur 292 ár 4 (dagur 1376, færzla nr. 628):

Ef einhver les þetta, hve mikið veit sá hinn sami um mig? Ekki margt, grunar mig. Ég skrifa nefnilega afar sjaldan það sem drífur á daga mína hérna.

En, samkvæmt teljaranum mínum skoða síðuna allra þjóða kvikyndi. Einn frá Hong Kong núna nýlega. Einn frá bænum "Viljandi" í Eistlandi fyrir einkverjum vikum. Já, það er staður þarna úti sem heitir "Viljandi."

Og hvað eru menn að skoða?



Þessi mynd hefur verið vinsæl undanfarið. En bara núna nýlega. Áður var það BMW Isetta, en það er farið að draga úr áhuga á henni. En það er eitt sem dregur alltaf að sér fólk:

Ford Torino!



Ford Torinu var framleiddur milli 1968 og 1976, og var hugsaður sem svona fínni týpa af Ford Fairlane.



Þetta er Argentínskur Fairlane, þeir voru framleiddir akkúrat svona milli 1968-1981. Argentína er svolítið eins og CCCP þannig.

Torino var hægt að fá með vélum frá 6 sílindra 200 rúmtommu línuvél, til 428 V-8. Árið 1969 var farið að nota 250 vél, í stað þeirrar 200, (ca 4 lítrar). Ég geri ráð fyrir að 6 sílindra línuvélin hafi ekkert eytt neitt meira en hvaða bíll sem er núna, af svipaðri stærð, en 428 týpan jafnaðist meira á við Range Rover eða Land Cruiser - að öllu leiti nema snerpu. Torino nefnilega hreyfist þegar maður stígur á bensíngjöfina.

Árið 1973 kom til greina að fá einn með 460. Það hefur verið... áhugavert. 460 eyðir nefnilega minnst 25 á hundraðið, sama hvað hún dregur með sér, og það er EF það er bein innspýting og annar nútíma útbúnaður. Árið 1973 held ég að við getum nú gleymt því. Bíllinn þá var um það bil 2 tonn og örugglega með 4 hólfa blöndung, Holley eða eitthvað þaðan af verra. Við erum sennilega að tala um 30 minnst. En: þetta fer kvartmíluna á 14 sekúndum án þess að þurfi að breyta neinu.



Þessi minnir svolítið á bílinn sem Mad Max var á. Það er ástæða fyrir því: Ford í ástralíu framleiddi svona bíla, en þótti ameríska týpan svolítið stærri en hún þurfti að vera, svo þeir styttu hana bara um svona 2-3 fet, notuðust við aðeins minni vélar (302) og kölluðu fyrirbærið Ford Falcon/Fairmont.



Reynið bara að leita að 1973 Ford Fairmont/falcon XB á google.



Þið finnið svona bíl mjög fljótlega.

Það er líka nokkuð mikið vesen að finna 1973-6 módel af Ford Tóríno sem er ekki búið að spreyja rauðan og hvítan.



Nóg komið af Ford í dag, held ég.

***

Úr 24 stundum, sem kom inn um lúguna einhverntíma:

24 stundir sögðu frá því í gær að þýzkt fjármálafyrirtæki, VKB, hygðist
bjóða upp á húsnæðislán í evrum hér á landi, á mun lægri vöxtum en innlend
húsnæðislán og án verðtryggingar. Margir fagna vafalaust erlendri samkeppni
á fjármálamarkaðnum hér, en hún hefur verið lítil til þessa.

Já, þar höfum við það. VKB eru komnir í fjármálageriann. Og orðnir þýskir.

Dagur 289 ár 4 (dagur 1373, færzla nr. 627):

Aftur hefur mér tekist að koma mér á framfæri. Í þetta skifti á einhverri síðu sem birtir barnasögur. Ég veit að þetta eru svolítið öðruvísi barnabókmenntir hjá mér. Svolítið í kaldhæðnari kantinum kannski.

Dagur 288 ár 4 (dagur 1372, færzla nr. 626):

Slökkvið ljósin, komið ykkur vel fyrir og horfið á kvikmynd kvöldsins: Carnival of souls, frá 1962. Enn ein kvikmynd sem enginn hefur séð. Eða heyrt um. Sem er mjög skrýtið.



Bíll aðasöguhetjunnar fellur fram af brú á örugglega 13 kmh.

Þetta er kvikmynd um kvenmann sem lendir í smá óhappi, og er í framhaldi af því elt uppi af púka. Það er betra en það hljómar. Ég get ekki sagt að þetta sé eitthvert episkt meistaratykki, en það virkar, merkilegt nokk.



Það eru 5 mínútur af auglýsingum fyrst - fyrir poppkorn og aðrar slappar kvikmyndir.

Hvað um það, þetta er örugglega flottasti titill á nokkurri B-mynd sem ég hef séð. Kvikmyndin sjálf er svona eins og voðalega langur Twilight-Zone þáttur, og hefur að öllum líkindum ekki kostað mikið meira en einn slíkur í framleiðzlu. Skv. Wikipedia var bödgetið $30.000 - þori ekki að fara með hve rétt það er. IMDB.com segir að kostnaðurinn hafi verið $17.000. Á sínum tíma nægði það fyrir filmu, nú, og þessum forláta bíl þarna og tjóninu sem hann olli á brúnni.

Ekki nema 78 mínútur að lengd, en samt eru sum atriðin eins og þau seu viljandi löng. Samt er þetta ekki versta kvikmynd í heimi. Langt frá því. Það þarf til dæmis ekki að drekka neina bjóra fyrst eins og er stundum nauðsynlegt. Ég færi ekki að bjóða upp á neitt svoleiðis, hvað haldiði að ég sé?



Búú!

Dagur 286 ár 4 (dagur 1370, færzla nr. 625):

Þessi náungi er núna uppáhaldslistamaðurinn minn. Hvers vegna? Jú, hann hefur nú framkvæmt gjörning sem hefur haft meiri áhrif en bara að láta almenning í þessu eina landi, og bara þann part af almenningnum sem veit af sýningunni á safninu, halda að það sé verið að hafa þá að fífli.

Neibb. Hann hafði þá að fífli í staðinn. Þeir þurfa ekki að halda neitt um það. Og ég fatta þetta, og ég get bent á heila þjóð og hlegið að þeim. Voru þeir hræddir við ÞETTA?

En hvað gerir maðurinn næst? Hvað toppar þetta? Ja, hann má búast við 4 ára fangelsi fyrir þetta, svo næst gæti hann til dæmis´búið til eftirlýkingu af Hiroshima bombunni, og skrifað á hana: "þetta er ekki kjarnorkusprengja", fyrir það fær hann minnst 10 ára dóm, svo þegar hann sleppur úr djeilinu getur hann sett upp dularfullt verk sem hann getur kallað: "þetta er ekki dómsdagsvél," og verið dæmdur í ævilangt fangelsi.

Já. Miðað við viðbrögðin við þessu hjá honum, mun fólk byrja að deyja í stórum stíl, bæði af hjartabilunum og sjálfsmorðum, af ótta við hina ógnvænlegu dómsdagsvél. Sem væri náttúrlega bara töff.

Þetta ameríkulið... Búið að tapa fyrir ímynduðum hryðjuverkamönnum.

***

Hvaða þörf er þetta hjá fólki við að vera hrætt við allan fjandann annars? Til dæmir miðborg RKV? Nú hef ég heyrt í mörgum íbúum 101-107, og enginn þeirra virðist óttast borgina, sama hvaða tími sólarhrings er. Það er jafnvel best að vera á ferli á nóttunni, þá fær maður að vera í friði, og getur gengið yfir götur án þess að flautað sé á mann.

Hinsvegar er fullt af fólki skíthrætt við RKV, og sérstaklega þeir sem aldrei koma þangað - svo ég nefni dæmi, þá eru vistmenn á elliheimilinu á Egilsstöðum þeir á landinu sem eru hræddastir við að vera einir á ferð í miðbæ RKV. Það var reynt að sannreyna þetta með því að spyrja fólk í Kína, en það var fallið frá því þegar tíundi kínverjinn í röð fölnaði upp, varð gráhærður og dó með það sama þegar orðasambandið "Miðbær Reykjavíkur" var nefnt.

***

Hef verið að heyra auglýsingu undanfarið þar sem mér er tilkynnt að visst fyrirtæki niðri í bæ eigi "mikið úrval í jólaseríum". Úrval af hverju eru þeir með í þessum jólaseríum? Ekki getur það verið umfangsmikið, fyrst það kemst fyrir inni í jólaseríu.

Sko, þegar maður er að auglýsa eitthvað, á maður að segja hvað það er. Til dæmis: "við eigum mikið úrval af gullfiskum í jólaseríum".

Úrval í jólaseríum? Kannski eru þeir að meina tímaritið úrval? Er það ekki hætt fyrir löngu? Ég hef ekki séð það.

Dagur 284 ár 4 (dagur 1368, færzla nr. 624):

"Ert þú byrjaður í þessu?" spurði einhver þegar ég var að afhenda pakka áðan. Ég þekkti ekki manninn, hafði aldrei séð hann áður. Það virðist vera að illi tvífarinn minn hafi hinsvegar verið á ferðinni.

Það hefur sést til þess náunga hér og þar. Ég var tvisvar inntur eftir ferðum mínum þegar ég vann á pallinum á Flytjanda út af þessum náunga. Hann fór til dæmis í Tívolí einusinni, og svo skilst mér hann vinni á einhverri skrifstofu, sem er að mig minnir staðsett við hliðina á Fíladelfíu.

Eða kannski eru það nokkrir? En ég held varla, því þá aukast líkurnar nokkuð að ég hafi hitt einn af þeim. Það er líka einkennilegt til þess að hugsa að þarna úti sé fjöldinn allur af mönnum sem líta út eins og ég, nógu mjög svo til að menn ávarpi mig sem slíkan í návígi.

Eða kannski er það bara þessi eini.

Nú vona ég innilega að þessir tvífarar mínir geri ekkert mikið af sér, svo mér verði ekki kennt um öll ósköpin. Það ætti ekki að vera allt of mikið vesen fyrir mig að finna hann. Ég lít bara í spegil, og virði mig fyrir mér, fer svo að leita að öðrum eins.

Veit ekki hvernig það mun ganga.

Dagur 281 ár 4 (dagur 1365, færzla nr. 623):

Í gær var mér boðið upp á hlaðborð og vín. Svo ég fékk mér ýmislegt. Lax og skinku og hangikjöt. Og laufabrauð og ristað brauð. Og skolaði því niður með svona lítra af rauðvíni.

Ég fékk mér mikið af skinkunni. Það er nefnilega gott að fá sér skinku við þynnku. Og kjöt almennt.

Og svo vaknaði ég fyrir allar aldir til að vinna. Ég á alltaf mjög auðvelt með að vakna fyrir allar aldir eftir mikla drykkju. Sem var gott, því þá hafði ég tíma til að búa til eggjaköku - sem er nauðsynlegt að gera stundum.

Dagur 280 ár 4 (dagur 1364, færzla nr. 622):

Jæja, þá er ég búinn að hripa niður enn eitt bókmenntastórvirkið. Alveg hundraðogfullt af blaðsíðum. Datt í hug í þetta skiftið að skrifa glæpasögu, með morðingja og löggu. Allt í lagi... það gekk...

Það eru yfir 50 morð. Svo ég er með þann part alveg dekkaðan. Verra er að löggan í sögunni eiginlega nennir ekki að leysa málið allan tímann, vill miklu frekar gramsa í skjölum, og morðinginn er hundleiðinlegur, situr bara og drekkur kaffi með vinnufélögunum milli þess sem hann laumast til að drepa einhvern af og til. Þar kemur titilpersónan inn í.

Svo er plottið flóknara en andskotinn. Ég ætla að salta þetta yfir Jól og kíkja á þetta aftur þá, til að sjá hvort það er ekki örugglega eins vitrænt og ég hélt. Mig minnir endilega að það falli allt saman á endanum. Þetta eru jú bara þessar 3 persónur, og ein þeirra gerir ekkert annað en að sitja og drekka kaffi. Jú, og drepa fólk af handahófi eftir hentugleikum.

Já. Með vel yfir 50 morð ætti sagan að höfða til 14 ára og eldri. Ég er ekki viss um að útgefendur verði sammála mér. Eh... fyrirfram gefnar hugmyndir um hvað 14 ára vilja. Á hinn bóginn gæti einhver munað hvað hann hugsaði þegar hann var 14 ára.

Ég þarf alltaf að hugsa í smá stund til að átta mig á því að ég er kominn aðeins yfir tvítugt. Þarf að muna ártalið, og reikna þetta allt út.

14 ára vilja örugglega meira blóð.

Dagur 277 ár 4 (dagur 1361, færzla nr. 621):

Rakst á þessa frétt.

Ég vissi þetta nú fyrir. En það er alveg deginum ljósara að þessir fréttamenn okkar kunna ekki að fara með verðmæti. Fyrst kaupa þeir Smith & Wesson skammbyssu, sem er hágæða smíðisgripur, fyrir þrefalt verð, og svo SKILA ÞEIR HENNI TIL LÖGREGLU!

Það er fyllilega sambærilegt við að kaupa upp mjólkurlager 11-11 til þess að hella honum niður, eða kaupa ritsafn Halldórs Laxness, leðurinnbundið, og kveikja svo í því.

Svo kemur þessi lína: "Í Kompási í kvöld verður einnig fjallað um morðið á Sæbrautinni í sumar. Sagt var frá því í fréttum okkar fyrir stuttu að skotvopnið sem þar hefði verið notað hefði verið fengið án tilskilinna leyfa."

Hér er náttúrlega bara verið að leita að sökudólg, því gæinn sem um er að kenna skaut sig í hausinn í geðveikiskasti. Vegna þess hann var geðveikur, og það alvarlega.

Svona hegðar fólk sér. Fyrir ekki löngu var ekið á mótorhjólamann, og hann kom í fréttum til að nöldra yfir því að bíllinn sem notaður var til að aka yfir hann var ekki skoðaður.

Og hvað með það? Er það afsökun allra? Ég veit að málshátturinn er svona: "Árinni kennir illur ræðari," en hann virðist vera orðinn svona: "Árinni er um að kenna í öllum tilvikum."

Fífl, ég er umkringdur fíflum.

Og hvað með það þó vel efnaðir menn geti orðið sér úti um hvers kyns vopn yfir helgi? Það hefur verið sýnt fram á það vísindalega að það væri bara til bóta ef fólk hefði sem greiðastan aðgang að skotvopnum. Jafnvel fáeinir hnífar gætu bætt ástandið, eins og áður hefur komið fram.

Þetta er EKKI eina tilfellið. Svona gengur þetta alltaf. Ef vopn eru tekin úr höndum almennings fara glæpamenn að herja meira á fólk. Þannig var það í Ástralíu á sínum tíma, Bretlandi, nokkrum borgum í USA (eftir fellybylinn fræga í New Orleans fjölgaði glæpum áberandi miklu meira þar sem ríkið safnaði vopnum fólksins til sín) og þannig mun það verða í Finnlandi.

Það er hins vegar ekki alveg rétt að glæpum fækki ef það eru fleiri byssur á götunni. Þeir bara hliðrast aðeins til - líkams árásum, nauðgunum og morðum fækkar, um þetta á bilinu 4-8%, en á móti fjölgar spjöllum á eigum opinberra og einkaaðila, auk þess sem fleiri bílum er stolið, og er fjölgunin merkilegt nokk: 4-7%

Vekur athygli að flestir bílþjófnaðir verða í Sviss og Ísrael. Þar er þó friðsælt að öðru leiti.

Sem leiðir hugann að því hvort verðmætamat fólks gæti verið eitthvað brenglað? En svo hugsa ég: auðvitað, en það er líka hrætt við suma hluti.

Annað sem vekur athygli er að meðalævilengd fólks er mest í þeim löndum sem leiðinlegast er að búa í. Hmm... heyrði það einu sinni að þunglynt fólk lifi lengur. Sem er náttúrlega frábært. Ef þér líður illa og vilt að þetta verði bara búið sem fyrst, þá lifir þú í auka tíu ár! Ó jess! Gleði.

Og enn að hlutum sem valda hávaða: það eru að koma áramót. Fyrirsjáanlega verða sprengjur. Ég hef líke veitt því athygli að það eru hesthús inni í miðju 201 hverfinu. Þvílík snilldar staðsetning! Að hafa matvæli á fæti, sem eiga það til að styggjast og hlaupa um við ítrekaðar sprengingar, inni í miðri borg.

Snilldin ein, segi ég.

Af hverju geta þessir aðilar sem hafa svo gaman af að moka skít ekki geymt lífverurnar sínar fyrir utan borgarmörkin? Þá hefðu þeir betri afsökun fyrir að aka um á LandCruiser dráttarvélunum sínum.

Þetta er hobbý, og það er byrjað að vera fyrir. Og það er skítalykt af því. Við eðlilegar aðstæður er skítalykt af því. Voru ekki reykingar bannaðar um allar trissur vegna þess nákvæmlega sama? Og hafa skal í huga að reykingar valda ekki fjórfættum matvælum úti á þjóðvegi í kringum áramót, né heldur gera reykingamenn mikið af því að drulla á vegi og gangstéttir. Þeir láta sér nægja að lykta skelfilega.

(Og mér vitandi deyja færri á hverju ári við að falla af baki reykjandi manna.)

Þetta er mjög einfalt: reykingamenn kúka ekki á gólfið ef þú býður þeim inn, en það eru hestar líklegir til að gera, og er bara alveg sama. Kurteisari reykingamenn bregða sér út til að fá sér smók, til að stinka ekki upp pleisið. Hestum er alveg sama. Hestamenn elska þegar hesturinn þeirra gefur frá sér afurðir hvert sem þeir fara, enda myndu þeir aldrei rata heim til sín aftur öðru vísi.

Sko, þeir æða eitthvert út, hellandi koníaki og öðrum viðbjóð oní sig, og enda uppi á heiði týndir, og það eina sem þeir þurfa að gera til að komast til baka er að fylgja skítaslóðinni eftir Skjóna sinn.

Réttu hlutirnir eru aldrei bannaðir. Auðvitað ætti að banna hestamennski innan bæjar og borga, enda lýti af. Og leyfa fólki að komast í byssur, svo það geti skotið þessi ferfættu kjötflykki þegar þau eru komin inn í garð og byrjuð að spora út blómabeðin, spreyjandi taði um í allar áttir á meðan.

Með hverri byssu ætti að fylgja hnífasett og grill. Og kryddhilla. Ég myndi styðja það.


+

+

+

+

=


Þannig á það að vera.

Dagur 276 ár 4 (dagur 1360, færzla nr. 620):

Þá halda foreldrar mínir að þau séu á leið til baka frá Kúbu.



En nei, lítið vita þau um það, enda er flugvélin eitthvað biluð, í öðru, töluvert meira framandi landi: nefnilega Kanada.

Það ók einhver asni á flugvélina, og rispaði hana lítillega, eins og sjá má að meðfylgjandi mynd:



Ég býst við þeim einhverntíma. Þau koma með Eimskip á endanum. Eftir páska. Kannski. Ef vindáttin er rétt.

Hvað um það. Þau geta þá væntanlega sagt okkur frá því hvort þau hittu Kastró, eða vofu hins ógnvænlega Téggivara, sem var einhver annar skúrkur sem bjó á Kúbu í denn og drap fullt af fólki og reyndi að breiða út kommúnisma og byltingar og... almenna eymd og volæði.

Eða, ef þau lesa þetta, geta þau bent þeim flug-gaurum á að setja bara teip á þetta. Það ætti að halda svona aðra leiðina. Nú, ef vængurinn dettur af, þá verða þau tvöfalt lengur á leiðinni.

Dagur 274 ár 4 (dagur 1358, færzla nr. 619):

Þá er orðið bannað að vera með súlustaði í Borg Óttans.

Tilvitnun: "Fram kemur í umsögninni að sérfræðingar í kynferðisofbeldi hafi sýnt fram á að í skjóli nektardansstaða þrífist gjarnan vændi"

Jamm. Hvernig fá þeir út að það sé algilt?

Nú er það svo að í miðbænum er um hverja helgi stunduð slagsmál. Ég velti fyrir mér hvort ekki eru uppi um hugmyndir þess efnis að loka miðbænum um helgar til að sporna við því? Til að draga úr ofbeldi meina ég?

Svo er þetta blessaða internet. Á því þrífst hvers kyns starfsemi. Jafnvel klám og vændi. Ég hef skellt upp mynd af dömu að taka dansspor hér til hliðar máli mínu til stuðnings. Næsta skref er þá væntanlega að loka Internetinu? Eða hvað?

Og hvað með Dagblöðin? Það eru í þeim smáauglýsingar undir fyrirsögninni "einkamál." Ljóst er að þar er verið að auglýsa klám og vændi. Fullt af öðru sennilega líka, en það er vissulega klám og vændi þarna. Örugglega. Ég er ekki svo viss um nektardansstaðina, en Fréttablaðið er ég viss um.

Það er til langur listi yfir hluti og vetvanga sem eru notaðir til glæpaiðkunar. Í byggingarvöruverzlunum eru seld kúbein, sem eru the græjur til innbrota, í apótekum fæst ritalín, amfetamín og kontalgín, og í bíaumbodum fást bílar. Þeir eru á hverjum degi notaðir til 2000 umferðarlagabrota sem löggan veit aldrei af.

Öllum þessum stöðum þarf augljóslega að loka í þágu almannaheilla.

Önnur tilvitnun: "þrír borgarfulltrúar Sjálfstæðisflokksins sátu hjá"

Hugleysingjar.



Tilvitnun 3: "Vísað er í greinargerð rannsóknarstofu í kvenna- og kynjafræðum við HÍ venga þessa"

Fréttamaður ætti að redda sér ritvilluleitarforriti. Venga?

Rannsóknarstofa í Kvenna & kynjafræðum? Af hverju töluðu þeir ekki bara við Sálarrannsóknafélagið, eða Hvítasunnusöfnuðinn? Eða hvað með Jólabæinn á Akureyri? Seiving Æsland liðið hefði líka getað gefið álit.

Ég fæ hausverk af þessu bulli.



Og þar hef ég sparað nokkrum smá panódil.

Ég ætti kannski að stofna svona rannsóknarstofu? "Rannsóknnarstofa í handahófskenndum myndum af nöktu kvenfólki uppi í tré." Ég gæti gefið álit á fullt af random ljósmyndum af nöktu kvenfólki uppi í tré.

Já, ég hef rætt við þessa feminista. Það var á stundum eins og þær væru að reyna að recruita mig í eitthvert költ, sem fékk mig alltaf tilað efast um það sem þær voru að segja.

"Er það ekki?" spurðu þær mig, og störðu á mig eins og krakki að sníkja nammi.



Ljúkum þessu með þessari dömu uppi í tré. Ég myndi stuðla að meiri klámvæðingu, en ég vil hafa myndskreytingarnar svolítið snyrtilegar hjá mér. Kvenfólk uppi í rté er alltaf svo merkilega settlegt. Annars dettur það niður, býst ég við.

Ég ætti að stuðla að vændi líka, en það er svo stutt síðan ég reyndi að pimpa Helga út. Kannski aftur eftir áramót. Pimpa út Bogga, það væri sniðugt. Kíki á það þá. Hvað ætli þær séu tilbúnar að borga fyrir hann? Hundrað kall? Fimm hundruð?

Hmm... kannski ef ég fer út í fjárkúgun: annað hvort taka þær Bogga fyrir 5000, eða ég fer heim til þeirra. Hafið samband, gerum samning.

Dagur 271 ár 4 (dagur 1355, færzla nr. 618):

Mér skilst að á næsta ári eigi að fara að brugga öl í Eyjum.

Hvernig verður það? Röltir maður þá ekki bara beint í fabrikkuna og kaupir sér nokkrar flöskur? Eða, það sem er líklegra að gerist:

Bjórinn verður seldur byrgja í Reykjavík og fluttur þangað. Þaðan verði honum svo dreyft um landið, þar á meðal til Vestmannaeyja. Þar verði hann boðinn til sölu í Ríkinu.

Það hljómar einhvernvegin miklu Ríkislegra. Alveg fullt af óþarfa og tilgangslausum flutningum, með tilheyrandi kostnaði sem veldur náttúrlega bara verðbólgu.

Rétt? Við komumst að því. Ég veðja á seinni tilgátuna, þá flóknari. Þorir einhver að veðja á móti mér, eða eru allir jafn kaldhæðnir?

Dagur 268 ár 4 (dagur 1352, færzla nr. 617):

Þegar ég lagði af stað hingað var Fitness keppnin í sjónvarpinu. Sá það kvenfólk sem tekur þátt í því. Sú með útstæðustu æðarnar á andlitinu vann. Auðvitað. Ég þori ekki að fara með það, en sú með sléttasta holdið hefur sennilega lent í neðsta sæti.



Þessi er greinilega ekki í fitness, enda sjást engar æðar á henni, né getum við stúderað vöðvabygginguna á henni náið án þess að nota hníf, held ég.

Sjáið líka þennan kaktus í bakgrunninum. Áttum svona kaktus einusinni. Svona kaktusar vaxa um metra á ári, að jafnaði, og þarf bara að vökva stundum - svona ef maður man.

Hvað um það. Mér varð hugsað til kellingarinnar í hídroxíkött auglýsingunni. Hún er nú ekki beint kynþokkafyllsta manneskja í heimi, hvorki fyrir né eftir. Herðarnar eru of breiðar miðað við mjaðmirnar. Sem þýðir að hún er aðeins of karlmannlega vaxin. Hún hefði sennilega átt að borða minna hídroxíkött og meiri snúð.

Hvað er svo fallegt við upphleyptar æðar? Og af hverju vill fólk endilega vera svona brúnt? Það baðar sig upp úr sósulit, og allt í einu er það álitið fallegast í heimi - af öllum nema mér.

Nei. Mér leið eins og ég væri að horfa á kjötborðið í Nóatúni. Allir þessir vöðvar, þessi sósubrúni litur, líkt og af leggjunum sem amma bauð mér uppá áðan. (Sósan var afar góð - meðan ég man - amma gerði smá mistök, hún opnaði bara pipardolluna og hellti öllu innihaldinu út í, svo úr varð all frábær sósa).

Þetta er ekki fallegt, en það er eitthvað mjög listaukandi við þetta. Nánast engin fita, bara hreint kjöt. Ætti að bráðna í munni. Með því þarf sósu. Rjóma eða rauðvíns? Ég held ekki að BBQ fari vel með þessu. Reyndar finnst mér BBQ ekki fara vel með neinu. Bragðast eins og aska. Ég er ekki hrifinn af ösku. Það má vera vel steikt, en fyrr má nú vera.

Hmm... lítur út eins og matur.

Kannski ég skjóti eina, og hafi í matinn fyrir einhverja föla dömu sem ég finn, einhversstaðar inni í dimmu herbergi. Þar hljóta þær að fela sig. Þarf að spyrja Illuga hvenær veiðitíminn á þessu liði er, ef einhver. Hugsa að þetta sé eins og selur. Veiðanlegt allt árið.

Hvaða rauðvín ætli fari vel með fitness manneskju?

Dagur 265 ár 4 (dagur 1349, færzla nr. 616):

Var að aka út pakka í Furuhlíðinni áðan. Fór í rangt hús, sem skiftir í sjálfu sér engu máli. En þá hafði einhver pjakkur á öðrum sendibíl keyrt upp innkeyrzluna, og hindraði að ég gæti bakkað út.

Nú er furuhlíðin stutt og þröng þar sem ég var, og ekki sá ég framm á að gæinn kæmist þangað sem hann vildi jafnvel þó ég æki áfram. Svo ég bakkaði niður götuna, til að gefa honum til kynna að ég væri á leið út. Ekki gaf pjakkurinn sig, enda þrjóskur mjög.

Þegar ég hafði beðið eftir því að hann færði sig í nokkra stund nennti ég þessu ekki lengur, og ók upp götuna í því skyni að snúa við - sem var snúið, því það er eiginlega ekkert pláss til þess. Ef ég gerði það, þá yrði peyjanum frekar ljóst að það væri ekki pláss fyrir hann til að aka upp á meðan ég ók niður.

Þegar ég var að snúa við virðist ég hafa ekið yfir mikið grjót sem er þarna á planinu. Það varð til þess að sauð á kunningja mínum, og hann stökk út úr bíl sínum, froðufellandi af illsku og gaf mér bendingu að nema staðar.

Ég gerði það, og skrúfaði niður rúðuna til að heyra hvað hann hafði að segja.

Já. Hann var reiður út af þessu grjóti, sem ég var þá ekki alveg með á hreynu hvort ég hafði lent á eða ekki. Hafði satt að segja meiri áhyggjur af bílnum sem var lagt við hlið þess.

Reykmökkurinn stóð úr báðum eyrum mannsins undir miklum þrýstingi þegar hann lýsti fyrir mér hverskonar stórglæpur það væri að aka yfir svona mosavaxna steina og ætla svo að stinga af. Hann lét eins og hann hefði farið öfugu megin frammúr hvern morgun alla vikuna, slík voru lætin.

Mér sýndist hann helst verða vonsvikinn þegar hann sá að þetta var bara mosavaxinn steinn sem hann var að æsa sig svo mjög yfir, en tók samt þá stefnu að vera mjög mjög reiður. Veit maðurinn ekki að það er ekki hollt að vera sífellt reiður?

Ekki tók ég mikið mark á manninum, frekar en öðrum mönnum í jafn-lélegu andlegu jafnvægi, þar sem ég stóð hjá og velti fyrir mér hvort ég ætti að vera dipló eða espa hann aðeins meira upp. Ég kaus að fara milliveginn, og sýna honum bara óvirðingu. Það hefði sennilega verið gaman að láta hann elta sig aðeins um hverfið.

Það veit ég að hann hyggst hringja í yfirmanninn. Verð að inna hann eftir því á morgun. Verð að spyrja hann hvort tryggingafélögin hafi hringt, svona í framhaldinu. Út af þessum steini, sem þeir hirtu ekki að fara með á brott þegar húsið var byggt.

Hmm... já. Ég tók númerið á bílnum hans: þetta er Renault Traffic, nr. OO-P70. Flautið á hann ef þið sjáið hann, og sjáið hvort hann froðufellir ekki fyrir ykkur.

Ef ég ætti að stoppa og tilkynna í hvert sinn sem ég rekst utan í einhvern kant... ég myndi ekki gera annað.

Dagur 264 ár 4 (dagur 1348, færzla nr. 615):

Spurning:

Eitrar maður gegn rottum, eða eitrar maður varðandi rottur?

Í gamla daga eitraði maður nefnilega fyrir rottum...

Dagur 263 ár 4 (dagur 1347, færzla nr. 614):

Keyrði framhjá um daginn þar sem ekið hafði verið á einhvern. Svo kom sjúkraliðið, og götunni var lokað af. Það var einhver vel yfir miðjum aldri sem hafði ákveðið að rölta af stað yfir götuna án þess að líta til hægri eða vinstri, býst ég við.

Ég var ekkert að skifta mér af því. Ég hefði bara verið fyrir, enda mikið af mannskap þegar búinn að safnast þarna saman.

***

Í Kastljósinu var verið að ræða við einhvern barnanýðing. Hann sagði að af þeim sem settir eru í steininn komi fæstir kynferðisbrotamenn til baka. Rétt er. Nauðgarar brjóta yfirleitt aðeins einusinni af sér. Barnaperrar virðast hinsvegar halda uppi meðaltalinu.

Svo tók ég líka eftir að þessir pésar allir kunnu ekki að tala, ekki bófinn, ekki fréttamaðurinn, ekki faðir fórnarlambs. Eða ætti ég kannski að orða það svona, þessir menn, varðandi tungumálið, með hliðsjón af íslensku, voru ekki skiljanlegt gagnvart mig.

Hálfvitar, allt saman.

Talar fólk svona heima hjá sér?

"Förum í frí, varðandi útlönd!"
"Hitaðu ofninn, gagnvart kjúklingnum."

***

MBL fréttin:

Árekstur varð á ljósunum á mótum Þingvallastrætis og Mýrarvegar á Akureyri í kvöld.

Þetta gerðis allt ofaná ljósunum. Töff stönt. Skerast þessar tvær götur einhversstaðar annarsstaðar, þar sem eru ekki ljós?

Engin slys urðu á fólki en annar bílanna er að sögn sjónarvotta ónýtur.

Hmm... Þetta er 1994-1997 Corolla. Það kostar sennilega um eða yfir 100K að gera við þetta. Já, ég held að dagar þessa farartækis séu taldir. En ég er ekkert að reiða mig á sjónarvottana. Það gæti verið hvaða lið sem er. Gæti afskrifað bílinn fyrir eitt brotið ljós, án nánari athugunar.

Mikil hálka var í bænum í dag og þykir líklegt að hún hafi átt þátt í þessum árekstri.

En fjólublá setning. Læra blaðamenn sérstaklega að orða allt svona formlega, eða halda þeir bara að það eigi að skrifa svona?

Dagur 261 ár 4 (dagur 1345, færzla nr. 613):

Jæja. Ég veit vel að þetta mun ekki virka, en ... hvað veit ég?

Hvað um það, þar sem kvenfólk hræðist mig mjög, hef ég í hyggju að pimpa í staðinn út minna ógnvekjandi kunningja mínum, honum Helga Ólafssyni.

Af einskærri illsku minni mun ég ætlast til að kvenþjóðin hringi í þennan mann og reyni að leggja lag sitt við hann, þeim að kostnaðarlausu, fyrir utan símatalið, að sjálfsögðu.

Eða þið getið ímeilað hann, á holyolafs(at)hotmailpúnturcom. Hvað sem ykkur lýst best á. Veit ekki símann, en hann er skráður í eyjum, alveg örugglega. Notið vefinn. (Þetta er einfalt ráð til að vinsa úr mestu vitleysingana, láta þær vinna einhver einföld verkefni)

Allavega, þetta er mjög ungur drengur ennþá, vel með farinn, engin eiturlyf, engar hrukkur, engin grá hár. Og hann er mjög mjúkur viðkomu sökum holdafars. Það höfðar örugglega til einhverra.

Jájá. Einmitt. Það eina sem þið þurfið að gera er að hafa samband við þennan mæta dreng, og bjóða honum eina kippu af bjór eða baknudd. Eða eitthvað annað sem þið teljið vænlegra til árangurs.

***

Ég þori að veðja að þetta virkar ekki. Með hliðsjón af lesendum, sko. Helgi er ekkert ógnvekjandi. En... ég held að ég sé ekkert ógnvekjandi heldur...

Dagur 259 ár 4 (dagur 1343, færzla nr. 612):

Var að velta fyrir mér: ætli margir hringi í Magga Kristins núna eftir að hann fékk sér þyrluna til að spyrja hvort það er í alvöru ófært?

Dagur 258 ár 4 (dagur 1342, færzla nr. 611):



280.

Stundum fæ ég póst frá talningagræjunni minni. Hún segir mér í nokkuð smáum atriðum hvaðan fólk kemur sem les síðuna. Flestir eru til dæmis frá Íslandi. Þó eru sumir frá framandi löndum. Einn flæktist til dæmis hingað frá Ulanbataar í Mongólíu.

En það segir svosem ekkert. Meira áhugavert er að sjá hvaða link fólk klikkar á sem ber það á akkúrat þessa síðu:

Google er sívinsælt. Mestan áhuga virðast menn hafa á Ford Torino. Það er alveg fínn bíll og allt það, en mikið finnst mér grunsamlega margir hafa áhuga á honum. Einn kom í gegnum gúgle eftir að hafa skrifað hinn dularfulla texta: vivarins reaction chimical.

Ég sagði þetta víst einhverntíma, án þess að koma alveg fyrir mig hvenær. Það var eitthvað í sambandi við kaffi, sem ég skrifaði stuttlega um fyrir 3 árum.

Frasinn: "hvernig á að búa til sprenguefni" færir þig líka hingað., eins og "krossgáta í fréttablaðinu" & "Ford módel T" eða "Panodil".

Jamm.

En lang flestir berast hingað af síðunum þeirra Bogga & Helga, vina Ketils. Kannski eru það þeir sjálfir, kannski erum við bara svona svipaðir?

Þori ekki að fara með það. En eins og er hef ég þann grun, byggðan á fáanlegum upplýsingum, að reglulegir lesendur séu á milli 10 - 15, og meðal lesandi er karlkyns íslendingur með allt of mikinn tíma.

Og meðan ég man:



Þar höfum við það.

Dagur 256 ár 4 (dagur 1340, færzla nr. 610):

Sjálfstæðisflokkurinn, sá flokkur sem lengst er til hægri af öllum flokkum á landinu, en er samt vinstra megin við miðju.

Þar sem nenna mín hefur ekkert aukist, tökum við bara fyrir litla klausu um samgöngur:

Samgöngumál

Sjálfstæðisflokkurinn telur mikilvægt að nýta til hlítar nýja möguleika á fjármögnun samgöngumannvirkja, s.s. gjaldtöku og einkaframkvæmd.

Þetta er mjög ógnvekjandi klausa: eftir alla þá blóðmjólkun sem vegfarendur hafa þurft að sætta sig við síðan bílar komu til landsins, þá á að hleypa einhverjum einkaaðilum í að blóðmjólka aðeins meira. Frábært. Alveg frábært. Ekki ljúga því að mér að peningarnir séu ekki til, þegar bensínið kostar hundraðkalli meira en í USA.

Og annað: NR eitt á forgangslista ALLRA RÍKJA síðan á dögum Rómaveldis, er vegakerfið. Afhverju er ekki svo hér?

Sjálfstæðisflokkurinn telur að auka þurfi fjárveitingar til tengivega og setja í forgang framkvæmdir á þeim landsvæðum þar sem enn er ekið á malarvegum og einbreiðum brúm.

Hættið þessu bauli um einbreiðar brýr. þetta eru MJÓAR brýr. Ein breið brú... tvær breiðar brýr. Helv...

Sjálfstæðisflokkurinn telur mikilvægt að unnið verði samfellt að gerð jarðganga um landið með það að markmiði að stytta vegalengdir, rjúfa vetrareinangrun og tryggja öruggar heilsárssamgöngur.

Hvaða vesen var ég að heyra um daginn um Héðinsfjarðargöng?

Sjálfstæðisflokkurinn vill að haldið verði áfram við uppbyggingu ferðamannavega því kröfur aukast um gott og öruggt aðgengi að helstu náttúruperlum landsins.

Hvað er ferðamannavegur? Hver er munurinn á slíkum vegi og öðrum vegum?

Sjálfstæðisflokkurinn vill að skoðaðir verði möguleikar á uppbyggingu hálendisvega.Náttúruvernd skal höfð að leiðarljósi við slíkar framkvæmdir.

Náttúran til fjandans fari. Gerið bara átóbaninn.

Sjálfstæðisflokkurinn telur nauðsynlegt að fara í brýnar framkvæmdir á höfuðborgarsvæðinu s.s. tvöföldun stofnbrauta og gerð stokka og mislægra gatnamóta svo auka megi afkastagetu innan svæðisins, tryggja öryggi vegfarenda sem best, bæta hljóðvist og loftgæði ásamt því að greiða fyrir umferð á helstu leiðum til og frá höfuðborginni.

Það þarf að rífa Reykjavík og byggja nýja. Hún er svo hrikalega illa skipulögð að það er ferlegt. Stofnbrautirnar eru allar misheppnaðar, ekki því þær eru mjóvar, heldur þær eru fáar. Umferð dreyfist ekki rétt um þær.

Að auki er löggan farin að taka upp á því að stöðva fólk úti á MIÐRI GÖTU og trufla þannig umferð. Lenti í tveimur svoleiðis áðan. Pirrandi. Þeir hefðu getað látið þá leggja út í kant, en nei, þetta skal sko fara fram úti á miðri helv. hraðbraut á háannatíma. Hvaða lið eru þeir eiginlega búnir að ráða í lögguna?

Sjálfstæðisflokkurinn vill að skoðaðar verði leiðir til að efla almenningssamgöngur í samstarfi við sveitarfélögin.

Reyndar treysti ég þeim fullkomlega til þess. Það eru áberandi fleyri í strætó eftir að námsmenn - eins og ég - fengu svona kort. Það var kominn tími til að sósíaldemókratíið stæði undir nafni. Nógu eru skattarnir háir.

Sér einhver kaldhæðnina í að kalla þetta hægri flokk?

Sjálfstæðisflokkurinn bindur vonir við að kaupskipum á íslenskri skipaskrá fjölgi með tilkomu nýrra laga sem tryggja kaupskipaútgerðum svipað skattaumhverfi og þekkist hjá frændþjóðum okkar á Norðurlöndum.

En grænhöfðaeyjar? Hvað með þær? Eru þær ekki með bertri reglur? Og panama? Hvað með að gera eins og þeir?

Sjálfstæðisflokkurinn telur að Reykjavíkurflugvöllur eigi áfram að gegna lykilhlutverki sem miðstöð innanlandsflugs. Mikilvægt er að hraða uppbyggingu samgöngumiðstöðvar við Reykjavíkurflugvöll.

Þeir segja að völlurinn verði í vatnsmýrinni í óþarflega mörgum orðum.

Og loks þetta: Sjálfstæðisflokkurinn vill staðsetja sjúkra- og björgunarþyrlu á landsbyggðinni og bæta þar með bráðaþjónustu og sjúkraflutninga.

Tvennt: Flugvélar eru ódýrari.
Flugvélar eru hraðskreyðari.

Þeir eru amk ekki gegn varðandi neinu.